२० पौष, काठमाडौं – राष्ट्रियसभा सदस्य निर्वाचनका लागि आज उम्मेदवारी दर्ता हुँदैछ । आगामी माघ १२ गते हुने १९ सिटका लागि हुने निर्वाचनका लागि निर्वाचन आयोगले बिहान १० बजेदेखि दिउँसो ३ बजेसम्म उम्मेदवारी दर्ताको समय तोकिएको छ ।

उम्मेदवारी दर्ताका लागि सत्तारुढ गठबन्धनले सिट बाँडफाड गरेर उम्मेदवारी दर्ता गर्ने भएका छन् । दलहरूले ७ जना महिला, ३ जना दलित, २ जना अपांगता भएका तथा अल्पसंख्यक र ७ जना अन्य क्लस्टर गरी १९ सिटका लागि हुने उम्मेदवारी दर्ता गराउनुपर्ने छ ।

निर्वाचन आयोगले सातवटै प्रदेश निर्वाचन कार्यालयमार्फत उम्मेदवारी दर्ता गर्ने व्यवस्था मिलाएको छ । प्रदेश १ को विराटनगर, २ को जनकपुरधाम, बागमतीको हेटौँडा, गण्डकीको पोखरा, लुम्बिनीको घोराही, कर्णालीको वीरेन्द्रनगर र सुदूरपश्चिमको धनगढीमा उम्मेदवारी दर्ता हुने छ । आज दर्ता भएका उम्मेदवारीउपर भोलि उजुरीको कार्यसूची छ भने २२–२३ पुसमा उजुरीमाथि छानबिन हुने छ । निर्वाचनमा भाग लिन १२ वटा दल आयोगमा दर्ता गराएका छन् ।

• Mr. Admin